Hepatiti, alarm ne Shqiperi

Apeli i ministrit: Kontrollohuni. E madhe mundësia për të qenë mbartës

Cikuli: Në Shqipëri më shumë problem hepatiti, sesa SIDA

Hepatiti C është më i frikshëm se sa SIDA. Alarmin e jep ministri i Shëndetësisë, Cikuli.

“Sa herë që flitet për HIV/AIDS, kjo veçanërisht mediave u duket interesante, por unë ju siguroj se hepatiti në vendin tonë është më problematik dhe ka një impakt shumë më të madh. Për më tepër, kur ne kemi një prevalencë të ulët të HIV/AIDS-it”, tha ministri. Kushdo mund të jetë mbartës i Hepatitit B apo C, prandaj motoja e këtij viti është “Testohuni”. Prevalenca e SIDA-s në vendin tonë është ulur, ndërsa 9 për qind e popullsisë është e prekur nga virusi i Hepatitit B. Për këtë të fundit shteti ka filluar vaksinimin, duke ulur rrezikshmërinë e përhapjes, ndërsa për hepatitin C askush nuk mund të mbajë shpresat te vaksina, sepse nuk ekziston.

“Përgjysmimi i të sëmurëve me hepatit B u realizua nëpërmjet fillimit të vaksinimit, ndërsa trajtimi i hepatitit C është më delikat, pasi nuk mund të parandalohet nëpërmjet vaksinimit”, u shpreh ministri Maksim Cikuli, gjatë aktivitetit të organizuar dje në Ditën Botërore të Sensibilizimit për hepatitin B dhe C.

Me sensibilizimin dhe mbështetjen e Ministrisë së Shëndetësisë, mori rrugë në 1994 vaksinimi i detyrueshëm i fëmijëve të porsalindur, një strategji e konsideruar e suksesshme për luftën kundër hepatitit B. Aktualisht Shqipëria ka një prevalencë prej 9 për qind të të prekurve me hepatit B.
Sipas Cikulit, Ministria e Shëndetësisë ka shtuar shumën deri në 280 mijë dollarë amerikanë për të blerë interferon, i cili është një trajtim i shtrenjtë për kurimin e hepatitit C, ku llogaritet 4800 dollarë për person. “Vaksinimi për hepatitin B nuk do të ndërpritet dhe ne po nxisim tregun e hapur farmaceutik”, deklaroi ministri. Sipas tij, është mjaft i rëndësishëm hartimi i një strategjie kombëtare. “Eshtë një nga mundësitë që jep një ndihmesë të madhe në trajtimin e të sëmurëve me hepatite virale, pasi vendi ynë ka avantazhe në realizimin e saj”, tha ministri, duke shtuar se këto sëmundje përbëjnë një problem të madh social, shëndetësor dhe ekonomik, ndaj për luftën ndaj hepatiteve duhet edhe përfshirja e shoqërisë. Cikuli sqaroi se aktualisht numri i të infektuarve me hepatit B është përgjysmuar, krahasuar me vitin 1991, ku prevalenca e sëmundjes ishte 18 për qind, ndërsa numri i të infektuarve me hepatit C konstatohet të jetë nga studimet rreth 1 për qind.

“Hepatitet përfaqësojnë sëmundjet infektive më të përhapura në botë, ku janë të infektuar nga hepatiti B 2 bilionë njerëz në botë, aktualisht të infektuar 350 milionë mbartës dhe 1 milion të infektuar këtë vit. Për hepatitin C ka 170 milionë të infektuar në të gjithë botën dhe 20 mijë të infektuar çdo vit”, tha Bashkim Resuli. Ai nënvizoi se rritja e sigurisë së përcaktimit dhe mënjanimit të përhapjes së Hepatit B dhe C në Bankën e Gjakut, nëpërmjet teknikave të ndjeshme dhe strategjia e donatorëve të gjakut pa pagesë, do të ndikojë në uljen e prevalencës të dy hepatiteve. Në aktivitetin e organizuar në kuadër të kësaj dite morën pjesë përfaqësues të Ministrisë së Shëndetësisë, Organizatës Botërore të Shëndetësisë, Shoqatës Shqiptare të Gastro-Hepatologëve, Shoqatës së Talasemikëve dhe Shoqatës së Hemofilikëve u diskutuan mënyrat e sensibilizimit për testimin dhe njohjen e Hepatitit B dhe C.